YeshiTenzin's profile呐喊——ཀི་སྒྲ།PhotosBlogListsMore  |  Tools Help |
呐喊——ཀི་སྒྲ།Tibetsheep |
||||||||
|
|
June 28 ལང་ཚོ་ཡི་རྦབ་ཆུ།སྔོ་ཞིང་བསངས་པའི་ནམ་མཁའ། དྲོ་ཞིང་འཇམ་པའི་ཉི་འོད། ཡངས་ཤིང་ཆེ་བའི་ས་གཞི། མཛེས་ཤིང་སྡུག་པའི་མེ་ཏོག མཐོ་ཞིང་བརྗིད་པའི་ལྷུན་པོ… … ཨེ་མ— དེ་ལས་ཀྱང་ཉམས་དགའ་བ་ནི། མདུན་ཕྱོགས་ཀྱི་བྲག་ངོས་གཟར་བོ་ན། ཆིལ་ཆིལ་དུ་འབབ་པའི་རྦབ་ཆུ་རེད། ལྟོས་དང་། ལྦུ་བའི་རླབས་ཕྲེང་དཀར་ཞིང་དྲི་མ་མེད་ལ། འོད་ཀྱི་ཐིག་ལེ་ནི་རྨ་བྱའི་སྒྲོ་མདོངས། ནེ་ཙོའི་སྒྲོ་ཐུལ། ཟ་འོག་རི་མོ། དབང་བོའི་གཞུ་རིས… … ཉོན་དང་། ཆུ་ཡི་བཞུར་སྒྲ་གསལ་ཞིང་སྙན་འཇེབས་ལྡན་ལ། ལང་ཚོའི་གླུ་དབྱངས་ནི་དྲི་ཟའི་གླུ། ཚངས་པའི་དབྱངས། དབྱངས་ཅན་ངག ཁུ་བྱུག་གདངས… … ཀྱེ—འདི་ནི་རང་བཞིན་གྱི་རྦབ་ཆུ་དཀྱུས་མ་ཞིག་མ་ཡིན་ཏེ། བརྗིད་ཅིང་རྔམ་པའི་ཉམས། འཇིགས་པ་མེད་པའི་སྙིང་། ཞུམ་པ་མེད་པའི་དཔའ། དར་ཞིང་རྒྱས་པའི་ལུས། མཛེས་ཤིང་འཕྱོར་བའི་རྒྱན། སྙན་ཞིང་འཇེབས་པའི་གླུ… … འདི་ནི— བོད་གངས་ཅན་གྱི་གཞོན་ནུ་རྣམས་ཀྱི་ལང་ཚོའི་རྦབ་ཆུ་རེད། འདི་ནི— དུས་རབས་ཉི་ཤུའི་ལོ་རབས་བརྒྱད་ཅུའི་བོད་རིགས་གཞོན་ནུ་རྣམས་ཀྱི་ གསར་གཏོད་ཀྱི་སྙིང་སྟོབས། འཐབ་འཛིང་གི་ཉམས་འགྱུར། ལང་ཚོ་ཡི་གླུ་སྒྲ་རེད། ཀྱེ་ཀྱེ།རྦབ་ཆུ་ཡི་ལང་ཚོ་ཡ། ལང་ཚོ་ཡི་རྦབ་ཆུ། ཁྱེད་ལ་འཇིགས་པ་མེད་པའི་སྙིང་སྟོབས་དང་། —ཞུམ་པ་མེད་པའི་སྤོབས་པ། —ཉམས་པ་མེད་པའི་ཟིལ་ཤུགས། —འཛད་མཐའ་མེད་པའི་སྟོབས་ཤུགས་འདི་ལྟ་བུ་ཞིག་ཇི་ལྟར་རྒྱས་པ་ཡིན། རེད་ལགས། དཔྱིད་གསུམ་མཁའ་ནས་བབས་པའི་ཆར་ཆུ། དབྱར་གསུམ་ས་ནས་བརྡོལ་བའི་ཆུ་མིག། སྟོན་གསུམ་སད་དང་སེར་བའི་སྙིང་བཅུད། དགུན་གསུམ་ཁངས་དང་ཁ་བའི་ཡང་བཅུད། གཞན་ཡང་། གངས་ཆུ—རྫ་ཆུ—གཡའ་ཆུ—ནགས་ཆུ— ན་ཆུ—རི་ཆུ—ལུང་ཆུ—ཕུ་ཆུ—མདའ་ཆུ— མདོར་ན། བཀྲ་ཤིས་པའི་ཆུ། —དགེ་ལེགས་འབྱུང་བའི་ཆུ། —དོན་གྲུབ་པའི་ཆུ། —ཡན་ལག་བརྒྱད་ལྡན་གྱི་ཆུ། —ཕུན་སུམ་ཚོགས་པའི་ཆུ་སྟེ། ཆུ་ཕྲན་མི་གཅིག་བརྒྱ་དང་བརྒྱད། ཆུ་སྣ་མི་གཅིག་ཁྲི་མ་འབུམ། ཁྱེད་ནི་མཐུན་སྒྲིལ་གྱི་ཆུ་ཞིག་ཡིན་པས། གཡང་གཟར་གྱི་བྲག་ལས་འབབ་པར་ཕོད། ཁྱེད་ནི་ཡོངས་འདུས་ཀྱི་ཆུ་ཞིག་ཡིན་པས། ངམ་རོང་གི་གཡང་ལས་མཆོང་བར་སྤོབས། ཁྱེད་ལ་གསར་བྱུང་གི་ཆུ་སྣ་བསྡུ་བའི་སྤོབས་པ་དང་ལྡན་པས། ཁྱེད་ཀྱི་བློ་རྒྱ་ཆེ་ཞིང་ལུས་སྟོབས་དར་ལ་ཟིལ་ཤུགས་ཆེ། ཁྱེད་ནི་ཁེངས་པ་སྤངས་ཤིང་དྲེགས་པའི་དྲི་མ་མེད་པས། ཁྱེད་ཀྱི་བཞུར་རྒྱུན་རིང་ལ་འབབ་རྒྱུན་དྲག། ཁྱེད་ལ་སྙིགས་མ་འདོར་ཞིང་སྙིང་བཅུད་གཞིབ་པའི་ནུས་པ་དང་ལྡན་པས། ། ཁྱེད་ཀྱི་ལུས་སེམས་གཙང་ལ་ལང་ཚོའི་དཔལ་ཡོན་རྒྱས། རྦབ་ཆུ་ཡ། ཁྱེད་ནི་ལོ་རྒྱུས་ཀྱི་དཔང་པོ་དང་། མ་འོངས་པའི་ལམ་འདྲེན་རེད། ཁྱེད་ཀྱི་དྲི་མ་བྲལ་བའི་ཆུ་ཐིགས་རེ་རེའི་ནང་དུ། གངས་ཅན་བོད་ཀྱི་འཕེལ་འགྲིབ་འཁོད་ཡོད་ལ། ཁྱེད་ཀྱི་གཟེགས་མ་འབར་བའི་རྡུལ་ཕྲན་རེ་རེའི་ནང་དུ། བསིལ་ལྡན་ཁ་བའི་ལྗོངས་ཀྱི་དར་རྒུད་འདུས་ཡོད། ཁྱེད་མེད་ན། སྒྲ་རིག་པའི་རལ་གྲི་ལ་ངར་ཇི་ལྟར་ལྡུད། ཁྱེད་མེད་ན། བཟོ་རིག་པའི་ཆུ་གྲི་ལ་རྣོ་ཇི་ལྟར་འཇོག ཁྱེད་མེད་ན། གསོ་རིག་པའི་ལྗོན་པ་རྒྱས་མི་ཐུབ་ལ། ཚད་མའི་མེ་ཏོག་དང་ནང་རིག་འབྲས་བུའང་སྨིན་མི་སྲིད། གཅིག་བྱས་ན— ཁྱེད་ཀྱི་ཆུ་ཤེལ་དང་འདྲ་བའི་སེམས་ལའང་། ལོ་རྒྱུས་ཀྱི་རྨ་ཁ་དང་། དམག་འཁྲུག་གི་ནད་རྙིང་། རྨོངས་དད་ཀྱི་ཆུ་བུར། རྙིང་ཞེན་གྱི་རྡུལ་ཕྲན་སོགས་མཆིས་ཀྱང་སྲིད་མོད། ཡིན་ན་ཡང་། ཁྱེད་ལ་ལང་ཚོའི་རྔམ་བརྗིད་དང་སྐྱེས་སྟོབས་ཀྱི་དཔལ་དང་ལྡན་པས། དགུན་གསུམ་གྱི་བཙག་གིས་ཁྱེད་ཀྱི་སེམས། —འཁྱག་རོམ་གྱི་སྒྲོམ་དུ་འཇུག་པའི་གོ་སྐབས་ནི་ནམ་ཡང་མ་མཆིས་ལ། རླུང་འཚུབ་ཀྱི་སྤུ་གྲིས་ཁྱེད་ཀྱི་བཞུར་རྒྱུན། —ལན་བརྒྱར་གཏུབས་ཀྱང་ཆོད་པའི་ངེས་པ་ནི་དེ་བས་ཀྱང་ག་ལ་ཡོད། རྒྱུ་མཚན་ནི— ཁྱེད་ཀྱི་ཆུ་མགོ་གངས་དང་འབྲེལ་ཞིང་། ཁྱེད་ཀྱི་ཆུ་རྔ་རྒྱ་མཚོར་འདྲེས་ཡོད་པའི་ཕྱིར། ཁྱེད་ཀྱི་ལོ་རྒྱུས་ཀྱི་བཞུར་རྒྱུན་རིང་མོས། ང་ཚོ་ལ་གཟི་བརྗིད་དང་ལ་རྒྱ་གནང་བ་དང་། ཁྱེད་ཀྱི་དུས་རབས་ཀྱི་བཞུར་སྒྲ་སྙན་མོས། ང་ཚོ་ལ་བསྐུལ་མ་དང་སྟོབས་ཤུགས་བསྩལ་བྱུང་། གསན་བྱུང་ངམ—རྦབ་ཆུ་ལགས། བོད་གངས་ཅན་གྱི་གཞོན་ནུ་རྣམས་ཀྱི་དྲི་བ་འདི་དག་ཁྱེད་ཀྱིས་གསན་པ་ཨེ་བྱུང་། སྙན་ངག་གི་རྟ་མཆོག་སྐོམ་པས་གདུངས་ན་ཇི་ལྟར་བྱ། སྡེབ་སྦྱོར་གྱི་གླང་ཆེན་ཚ་བས་གཙེས་ན་ཇི་ལྟར་བྱ། མངོན་བརྗོད་ཀྱི་སེང་གེ་དྲེགས་པས་གཟིར་ན་ཇི་ལྟར་བྱ། ཟློས་གར་བུ་ཆུང་དྭ་ཕྲུག་ཏུ་ལུས་ན་ཇི་ལྟར་སྐྱོང་། སྐར་རྩིས་ཀྱི་ཕ་ཤུལ་སྟོང་བར་ལུས་ན་སུ་ཡིས་འཛིན། ཚན་རིག་གི་གཞོན་ནུ་མག་པར་ལེན་ན་བསུ་བ་ཇི་ལྟར་བགྱིད། ལག་རྩལ་གྱི་བུ་མོ་བག་མར་བསུ་ན་ཁྱོ་བོ་སུ་ཡིས་བྱ། ལགས་སོ—རྦབ་ཆུ་ལགས། ཁྱེད་ཀྱི་དྭངས་ཤིང་གསལ་ལ་སྙན་ཞིང་འཇེབས་པའི་གླུ་སྒྲ་ལས་བྱུང་བའི་ལན་དེ་དག —ང་ཚོའི་སེམས་ལ་རྡོ་ལ་རི་མོ་བརྐོས་པ་ལྟར་བཟུང་ཡོད། ངོ་མ། མཚར་སྡུག་འོད་སྟོང་འབར་བའི་སྔོན་ཆད་ཀྱིས་ད་ལྟའི་ཚབ་བྱེད་མི་རུང་ལ། བ་ཚྭའི་དྲི་དང་འགྲོགས་པའི་ཁ་སང་གིས་དེ་རིང་གི་སྐོམ་པ་ག་ལ་སོད། རྙེད་པར་དཀའ་བའི་ལོ་རྒྱུས་ཀྱི་བེམ་པོའི་ལུས་པོ་ལ། དུས་དང་མཐུན་པའི་སྲོག་གི་དབང་བོ་མ་ཞུགས་ན། ཡར་རྒྱས་ཀྱི་འཕར་རྩ་ལྡིང་མི་སྲིད་ལ། སྔོན་ཐོན་ཀྱི་སྙིང་ཁྲགརྒྱུ་མི་ཐུབ་ཅིང་། མདུན་བསྐྱོད་ཀྱི་གོམ་པ་ནི་དེ་བས་ཀྱང་ངོ་། ཀྭ་ཡེ།རྦབ་ཆུ་ལགས། ཁྱེད་ཀྱི་ཆིལ་ཆིལ་གཡོ་བའི་རླབས་ཕྲེང་དང་། ལང་ལོང་འཐོར་བའི་གཟེགས་མ་ལས— ང་ཚོ་སྟེ། —བོད་གངས་ཅན་གྱི་མི་རབས་གསར་པའི་སྟོབས་ཤུགས་མཚོན་པ་དང་། ཁྱེད་ཀྱི་ཤང་ཤང་འབབ་པའི་ཆུ་རྒྱུན་དང་། འུར་འུར་བཞུར་བའི་ཆུ་སྒྲ་ལས— ང་ཚོ་སྟེ། —བོད་གངས་ཅན་གྱི་མི་རབས་གསར་པའི་ཕུགས་བསམ་མངོན་འདུག རྙིང་ཞེན། བག་འཁུམ། རྨོངས་དད། ལེ་ལོ… … ང་ཚོའི་མི་རབས་འདིར་འཇུག་ཡུལ་གཏན་ནས་མེད། རྗེས་ལུས། ཀླ་ཀློ མུན་ནག ལོག་སྤྱོད… … ང་ཚོའི་དུས་རབས་འདིར་གནས་ས་ཡེ་ནས་མེད། རྦབ་ཆུ་ཡ་རྦབ་ཆུ། ང་ཚོའི་སེམས་ནི་ཁྱེད་ཀྱི་འགྲོས་དང་བསྟུན་ནས་གཡོ་བ་དང་། ང་ཚོའི་ཁྲག་ཀྱང་ཁྱེད་ཀྱི་རྒྱུན་དང་འགྲོགས་ནས་བཞུར་གྱིན་ཡོད། མ་འོངས་པའི་ལམ་ཁར— ཀྱག་ཀྱོག་སྔར་ལས་ཆེ་ན་ཡང་། བོད་ཀྱི་གཞོན་ནུ་རྣམས་འཇིགས་པའི་གོ་སྐབས་བྲལ་ཞིང་། ང་ཚོས་རང་རེའི་མི་རིགས་འདིར། མདུན་བསྐྱོད་ཀྱི་ལམ་གསར་པ་ཞིག་འབྱེད་ངེས་ཡིན། ལྟོས་དང་། གྲལ་འགྲིག་པའི་རུ་དཔུང་དེ་ནི།བོད་གངས་ཅན་གྱི་མི་རབས་གསར་པ་རེད། ཉོན་དང་། འགྲོས་མཉམ་པའི་གླུ་སྒྲ་དེ་ནི།བོད་གངས་ཅན་གྱི་གཞོན་ནུའི་གོམ་སྒྲ་རེད། འོད་གསལ་གྱི་ལམ་ཆེན། གཟི་བརྗིད་ཀྱི་ལས་འགན། བདེ་སྐྱིད་ཀྱི་འཚོ་བ། འཐབ་འཛིང་གི་གླུ་དབྱངས། རྦབ་ཆུའི་ལང་ཚོ་ལ་ཡལ་བ་མེད་ཅིང་། ལང་ཚོའི་རྦབ་ཆུ་ནི་དེ་བས་ཀྱང་ཉམས་པ་མེད། འདི་ནི— བོད་གངས་ཅན་གྱི་གཞོན་རབས་རྣམས་ཀྱི་ངག་ལས་བྱུང་བའི་ལང་ཚོའི་རྦབ་ཆུ་རེད། འདི་ནི— བོད་གངས་ཅན་གྱི་གཞོན་ནུ་རྣམས་ཀྱི་སེམས་ན་འབབ་པའི་ལང་ཚོའི་རྦབ་ཆུ་རེད། May 18 དཔལ་དོན་གྲུབ་རྒྱལ་གྱི་རྐང་ལམ་ཕྲ་མོ་ལས་བཤུས།དཔལ་དོན་གྲུབ་རྒྱལ་གྱི་རྐང་ལམ་ཕྲ་མོ་ལས་བཤུས།
ཁྲེལ་མེད་ཀྱི་མི་རྣམས་ཨ།
ཁྱོད་ཚོ་དཔའ་བོའི་བཏོད་པའི་ལམ་དུ་འགྲོ་ཤེས་པ་ལས།དཔའ་བོའི་མཛད་རྗེས་དང་མཚན་ཉིད་ལ་མོས་གུས་དང་
བསྔགསབརྗོད་མི་བྱེད་པར་མ་ཟད།ད་དུང་འཁང་ར་དང་སྡང་སེམས་འཛིན་དོན་ཅི་ཡོད།ཁྱོད་ཀྱིས་གནའ་མིས་
བཏོད་པའི་ལམ་འགྲམ་དུ་རྐུབ་བཞག་སྟེ་གནའ་མི་གླན་པ་དེ་ཚོ་ཞེས་དམོད་པ་བོར་དུས་ཁྱོད་ཀྱི་སྙིང་ལ་ཙག་ཤག་
ཅིག་མི་རྒྱུག་གམ།ངོ་མ། ཁོང་ཚོས་ང་ཚོར་རྐང་ལམ་ཕྲ་མོ་ཞིག་མ་གཏོགས་འཇོག་མི་ཐུབ། ཡིན་ན་ཡང་།
ལོ་ངོ་ཁྲིམས་སྟོང་མང་པོའི་རིང་ལ།ལམ་ཕྲན་འདི་རྒྱ་ཆེ་དང་ཁོད་ཇེ་སྙོམ་ཇེ་ཡངས་སུ་གཏོང་མི་ཐུང་པ་དེ་ནི་
ང་ཚོའི་ངོ་ཚ་ཡིན་པ་ལས་གནའ་མིའི་གླེན་རྟགས་ག་ལ་ཡིན།
ཁོང་ཚོས་ང་ཚོར་བཞག་པའི་རྐང་ལམ་ཕྲ་མོ་འདི་ནི་རང་བཞིན་གྱི་ལམ་དཀྱུས་མ་ཞིག་མ་ཡིན་ཏེ།
ལམ་ཕྲ་འདིས་བོད་གངས་ཅན་གྱི་ལོ་རྒྱུས་ཐོག་མར་བསྐྲུན་ཏེ་རིག་དར་གྱི་བོད་རིགས་འདི་སྔོན་ཐོན་གྱི་རི་
རྩེར་བསྐྱལ་བ་དང་།ལྔ་རིག་གི་གླེགས་མཛོད་ཀྱིས་ལྕགས་རི་བསྐོར་ཏེ་འཛམ་གླིང་གི་ཡང་རྩེ་ནས་ཁྱིམ་གཞི་
བཙུགས་ཤིང་།དེ་ནས་བཟུང་གདོང་དམར་བོད་ཀྱི་རུས་རྒྱུད་རྣམས་རྒྱུན་མ་ཆད་པར་དར་བ་ཡིན།
ཁྲེལ་ཡོད་ཀྱི་མི་རྣམས་ཨ། ཁྱོད་ཚོ་དཔའ་བོས་བཏོད་པའི་ལམ་དུ་འགྲོ་ཕོད་པར་མ་ཟད། དཔའ་བོའི་མཛད་རྗེས་དང་མཚན་ཉིད་ལ་མོས་གུས་དང་བསྔགས་བརྗོད་ཀྱང་མཛད་ཡོད་མོས།
འོན་ཀྱང་ཁོང་ཚོའི་གསར་གཏོད་ཀྱི་སྙིང་སྟོབས་དང་མཁས་མཛངས་ཀྱི་བློ་གྲོས་ལ་སློབ་སྦྱོང་མི་བྱེད་པའམ་
ཡང་ན་བྱེད་མི་མཁས་པར།རྨོངས་ཚོད་ཀྱི་སྒོ་ནས་དཔའ་བོའི་མཛད་རྗེས་རྣམས་ངག་གི་ཕྲེང་བར་
བཟློ་བ་ཙམ་གྱིས་ཅི་ལ་ཕན།
May 02 ཁ་ཆེ་ཕ་ལུ།ཁ་ཆེ་ཕ་ལུ། ཁ་ཆེ་ཕ་ལུའི་འཇིག་རྟེན་ལས་འབྲས་རྩི་ལུགས་ཀྱི་བསླབ་བྱ་ཞེས་པ་འདི་ཉིད་ལ་ལས་པཎ་ཆེན་སྐུ་ཕྲེང་བདུན་པ་བསྟན་པའི་ ཉི་མས་མཛད་སྐད་དང་།ལ་ལས་ལོ་རྒྱུས་ཐོག་བྱུང་བའི་ཁ་ཆེ་བ་ཕ་ཙུའུ་ཞེས་པས་བྲིས་སྐད་སོགས་ཀྱི་ཤོད་ཚུལ་འགའ་ཤས་ ཡོད་ལུགས་ཀྱང་དེབ་འདིའི་མ་དཔེའི་ནང་སུ་ཞིག་ གིས་བརྩམས་སྐོར་གསལ་ཆ་མེད་སྟབས་རྩོམ་པ་པོ་འདི་ཡིན་ཞེས་ མཐའ་ཅིག་ཏུ་མ་ངེས། ཁ་ཆེ་ཕ་ལུའི་བསླབ་བྱའི་དྲ་བ། http://kachepalu.googlepages.com/
རབ་བྱེད་དང་པོ། མཁས་པ་བརྟག་པ།༢༄༅། །ལེགས་པར་བཤད་པ་རིན་པོ་ཆེའི་གཏེར་ཞེས་བྱ་བའི་བསྟན་བཅོས། ས་པཎ་ཀུན་དགའ་རྒྱལ་མཚན་གྱིས་མཛད། རབ་བྱེད་དང་པོ། མཁས་པ་བརྟག་པ། ༢ ཁོང་མཛངས་བསོད་ནམས་བསགས་པའི་མི། །གཅིག་པུ་ཡིན་ཡང་ཀུན་ལས་རྒྱལ། ། རི་དྭགས་རྒྱལ་པོ་སེང་གེ་དང་། །འཁོར་ལོས་སྒྱུར་ལ་གྲོགས་མི་དགོས། །
ཐབས་ལ་མཁས་ན་ཆེན་པོ་ཡང་། །བྲན་དུ་བཀོལ་བར་ག་ལ་དཀའ། ། མཁའ་ལྡིང་མཐུ་རྩལ་ཆེ་ན་ཡང་། །གོས་སེར་ཅན་གྱི་བཞོན་པར་འགྱུར། །
འཇིག་རྟེན་འདི་དང་ཕ་རོལ་གྱི། །བདེ་བ་བསྒྲུབ་པ་ཤེས་རབ་ཡིན། ། རྒྱལ་བུ་ཟླ་བའི་ཤེས་རབ་ཀྱིས། །བྲན་བཟང་འདི་དང་ཕྱི་མར་བསྐྱབས། །
དཔའ་ཞིང་མཐུ་རྩལ་ཆེ་ན་ཡང་། །མཁས་པ་མིན་པས་དཔའ་མི་ཐོབ། ། འབྱོར་པ་ཐོབ་པར་གྱུར་ན་ཡང་། །བསོད་ནམས་མེད་ན་ག་ལ་རྟག །
ཡོན་ཏན་སྐྱོན་གཉིས་སུས་ཀྱང་གསལ། །འདྲེས་པ་འབྱེད་ཤེས་མཁས་པ་ཡིན། ། ཆུ་ལས་འོ་མ་ངང་པས་ཕྱེ། །བ་ལས་འོ་མ་ཀུན་གྱིས་ལོང་། །
སྨྲས་ཤིང་བསྐུལ་བར་གྱུར་པ་ན། །དུད་འགྲོ་ལ་ཡང་གོ་བ་སྐྱེ། ། མ་བསྐུལ་གཞན་གྱིས་མ་སྨྲས་པར། །བསམ་པ་ཤེས་ན་མཁས་པ་ཡིན། །
བློ་དང་ལྡན་ན་མ་སྨྲས་ཀྱང་། །རྣམ་འགྱུར་ཉིད་ལས་བསམ་པ་གོ། ། བལ་པོའི་སེའུ་མ་ཟོས་ཀྱང་། །ཁ་དོག་ཉིད་ལས་བྲོ་བ་ཤེས། །
མཁས་པ་རང་གི་ཡུལ་བས་ཀྱང་། །ཡུལ་ཁམས་གཞན་ན་མཆོད་པ་ཐོབ། ། ནོར་བྱ་གཞན་དུ་བྲིན་པ་ཙམ། །རྒྱ་མཚོའི་གླིང་དུ་ག་ལ་བྲིན། །
མཁས་པ་སློབ་པའི་དུས་ན་སྡུག །བདེ་བར་སྡོད་ལ་མཁས་མི་སྲིད། ། བདེ་བ་ཆུང་ལ་ཆགས་པ་དེས། །ཆེན་པོའི་བདེ་བ་ཐོབ་མི་སྲིད། །
བློ་དང་ལྡན་ན་ཉམ་ཆུང་ཡང་། །སྟོབས་ལྡན་དགྲ་ཡིས་ཅི་བྱར་ཡོད། ། རི་དྭགས་རྒྱལ་པོ་སྟོབས་ལྡན་པ། །རི་བོང་བློ་དང་ལྡན་པས་བསད། །
སེམས་ཅན་གཞན་དང་རྗེས་མཐུན་པའི། །སྤྱོད་པ་ཤེས་ན་མཁས་པ་ཡིན། ། དུད་འགྲོ་ཡིན་ཡང་རིགས་མཐུན་རྣམས། །ཁྱུ་གཅིག་ཏུ་ནི་མི་གནས་སམ། །
ངེས་པར་འབྱུང་བའི་བྱ་བ་འགའ། །མ་གྲུབ་པ་ན་དཔྱོད་པའི་ཚེ། ། མཁས་རྨོངས་གཉིས་ཀྱི་ཁྱད་པར་ཤེས། །གྲུབ་ནས་དཔྱོད་པ་བླུན་པོའི་ཚུལ། །
མཁས་པ་རྣམས་ཀྱིས་དཔྱད་པ་ཡི། །ཤེས་བྱ་ཤེས་ན་མཁས་པར་བགྲང་། ། བ་ལང་རྒན་གཞོན་དཔྱོད་པ་ལ། །བླུན་པོ་མཁས་ཀྱང་ཡོན་ཏན་མིན། །
རྒྱ་མཚོ་ཆུ་ཡིས་མི་ངོམས་ཤིང་། །རྒྱལ་པོའི་བང་མཛོད་ནོར་གྱིས་མིན། ། འདོད་ཡོན་སྤྱད་པས་མི་ངོམས་ཏེ། །མཁས་པ་ལེགས་བཤད་ཀྱིས་མི་ངོམས། །
ལེགས་བཤད་བྱིས་པ་དག་ལས་ཀྱང་། །མཁས་པ་རྣམས་ནི་ཡོངས་སུ་ལེན། ། དྲི་ཞིམ་འབྱུང་ན་རི་དྭགས་ཀྱི། །ལྟེ་བ་ལས་ཀྱང་གླ་རྩི་ལེན། །
ལེགས་པར་བཤད་པ་རིན་པོ་ཆེའི་གཏེར་ལས་མཁས་པ་བརྟག་པ་སྟེ་རབ་ཏུ་བྱེད་པ་དང་པོའོ། །
རབ་བྱེད་དང་པོ། མཁས་པ་བརྟག་པ།༡༄༅། །ལེགས་པར་བཤད་པ་རིན་པོ་ཆེའི་གཏེར་ཞེས་བྱ་བའི་བསྟན་བཅོས། ས་པཎ་ཀུན་དགའ་རྒྱལ་མཚན་གྱིས་མཛད། རབ་བྱེད་དང་པོ། མཁས་པ་བརྟག་པ། ༡ མཁས་པ་ཡོན་ཏན་མཛོད་འཛིན་པ། །དེ་དག་ལེགས་བཤད་རིན་ཆེན་སྡུད། ། རྒྱ་མཚོ་ཆེན་པོ་ཆུ་བོའི་གཏེར། །ཡིན་ཕྱིར་ཆུ་བོ་ཐམས་ཅད་འབབ། །
སྐྱེ་བོ་ཡོན་ཏན་ཡོད་མེད་པའི། །བླང་དོར་བློ་གྲོས་ལྡན་པ་མཁས། ། རྡུལ་དང་འདྲེས་པའི་ལྕགས་ཕྱེ་རྣམས། །ཁབ་ལེན་རྡོ་ཡིས་ལེན་པར་ཤེས། །
ལེགས་བཤད་མཁས་པའི་བློ་གྲོས་ཀྱིས། །གོ་ཡི་བླུན་པོས་དེ་ལྟ་མིན། ། ཉི་མའི་འོད་ཟེར་ཤར་བ་ན། །འབྱུང་པོའི་བྱ་རྣམས་ལོང་བར་འགྱུར། །
ཤེས་རབ་ལྡན་པས་ཉེས་པ་དག །སེལ་བར་ནུས་ཀྱི་བླུན་པོས་མིན། ། ནམ་མཁའ་ལྡིང་གིས་དུག་ཅན་སྦྲུལ། །གསོད་པར་ནུས་ཀྱི་ཁྭ་ཏས་མིན། །
བློ་གྲོས་ཆེན་པོ་རྒུད་ན་ཡང་། །ལྷག་པར་བློ་གྲོས་སྟོབས་ལྡན་འགྱུར། ། རི་དྭགས་རྒྱལ་པོ་བཀྲེས་པ་ན། །གླང་ཆེན་སྤྱི་བོ་མྱུར་དུ་འགེམས། །
མཁས་པ་རྩད་ཅིང་མ་དྲིས་པ། །དེ་ཡི་བར་དུ་གཏིང་མི་དཔོགས། ། རྔ་ལ་དབྱུག་གུས་མ་བསྣུན་པ། །དེ་སྲིད་གཞན་དང་ཁྱད་ཅི་ཡོད། །
རིག་པ་ནང་པར་འཆི་ཡང་བསླབ། །ཚེ་འདིར་མཁས་པར་མ་གྱུར་ཀྱང་། ། སྐྱེ་བ་ཕྱི་མར་བཅོལ་བ་ཡི། །ནོར་ལ་རང་ཉིད་ལེན་པ་འདྲ། །
ཡོན་ཏན་ལྡན་ན་སྐྱེ་བོ་ཀུན། །མ་བསྡུས་པར་ཡང་རང་ཉིད་འདུ། ། དྲི་ལྡན་མེ་ཏོག་རྒྱང་རིང་ཡང་། །བུང་བ་སྤྲིན་གྱི་ཚོགས་བཞིན་འཁོར། །
མཁས་པ་ཡོན་ཏན་ཀུན་བསླབས་པ། །མཐར་ཕྱིན་གཅིག་གིས་འཇིག་རྟེན་གསལ། ། བློ་ངན་ཤེས་པ་མང་ན་ཡང་། །རྒྱུ་སྐར་བཞིན་དུ་གསལ་མི་ནུས། །
མཁས་པ་ཡོན་ཏན་དཔག་མེད་ཀྱང་། །གཞན་གྱི་ཡོན་ཏན་ཆུང་ངུའང་ལེན། ། དེ་ལྟར་རྒྱུན་དུ་སྤྱད་པ་ཡིས། །མྱུར་དུ་ཐམས་ཅད་མཁྱེན་པར་འགྲོ། །
མཁས་པ་ཤེས་རབ་ཀྱིས་བསྲུང་ན། །དགྲ་བོ་མང་ཡང་ག་ལ་ཚུགས། ། འཕགས་རྒྱལ་གྱི་ནི་བྲམ་ཟེའི་བུ། །གཅིག་པུས་དགྲ་བོའི་ཚོགས་ཀུན་བཅོམ། །
བློ་ཆུང་གྲོས་ཉེས་འཁྲུགས་པའི་ཚེ། །བློ་ལྡན་ཐབས་ཀྱིས་བདེ་བར་གསོ། ། ཆུ་ཀླུང་རྙོག་པས་ཆུད་གཟན་པ། །ཆུ་མདངས་ནོར་བུས་དྭངས་པར་བྱེད། །
མཁས་པ་ཇི་ལྟར་ཐབས་རྡུགས་ཀྱང་། །བློན་པོ་འཇུག་པའི་ལམ་མི་འགྲོ། ། ཆར་འདོད་བྱེའུ་སྐོམ་ན་ཡང་། །ས་ལ་བབས་པའི་ཆུ་མི་འཐུང་། །
ཤེས་རབ་ལྡན་པ་མགོ་བསྐོར་ཡང་། །བྱ་བའི་ཆ་ལ་རྨོངས་མི་འགྱུར། ། སྲོག་ཆགས་གྲོག་མ་མིག་མེད་ཀྱང་། །མིག་ལྡན་གཞན་ལས་ལྷག་པར་མགྱོགས། །
བློ་གྲོས་ལྡན་པ་གཉིས་བགྲོས་ན། །བློ་གྲོས་ལེགས་པ་གཞན་འབྱུང་སྲིད། ། ཡུང་བ་དང་ནི་ཚ་ལེ་ལས། །ཁ་དོག་གཞན་ཞིག་སྐྱེ་བར་འགྱུར། །
|
|||||||
Send a private message
Tell a friend
Add to My MSN
Add to your network
Sign up for alerts|
|
